Cynhwysiant digidol

Heddiw mae'r gallu i ddefnyddio technolegau newydd yr un mor bwysig â darllen ac ysgrifennu. Mae'r unigolion nad ydynt yn meddu ar y sgiliau hyn yn debygol o fod yn fwy ar eu colled o safbwynt economaidd a chymdeithasol.

Dyma agenda sy'n ymwneud â phobl a gwella eu bywydau; y gallu i gyfathrebu yn haws; cael gafael ar nwyddau yn haws ac yn rhatach a'i gwneud yn haws manteisio ar wasanaethau cyhoeddus. Mae Cynhwysiant Digidol hefyd yn ymwneud â lleihau ynysu cymdeithasol. Mae'n fanteisiol i bobl fel dinasyddion a defnyddwyr.

Mae Llywodraeth Cymru'n ymrwymedig i fynd i'r afael ag allgáu digidol fel y'i adlewyrchir yn ei menter 2.0 a'i Fframwaith Cynhwysiant Digidol.

Cafodd y fenter Cymunedau 2.0 ei sefydlu ym mis Ebrill 2009 gyda chyllideb o £19.9 miliwn am gyfnod o chwe blynedd. Mae'r prosiect yn helpu grwpiau'r sector cymunedol a gwirfoddol a mentrau cymdeithasol i ddefnyddio technolegau. Fe'i cyflwynir gan gonsortiwm o bum corff o dan arweiniad Canolfan Cydweithredol Cymru. Mae rhagor o wybodaeth ar gael ar wefan Cymunedau 2.0.

Yn dilyn cyfnod ymgynghori o dri mis, cyhoeddwyd Fframwaith Cynhwysiant Digidol ym mis Rhagfyr 2010. Mae Llywodraeth Cymru'n bwriadu defnyddio'r Fframwaith hwn i roi arweiniad strategol pendant ac mae'n amlinellu ein hymrwymiad i helpu i oresgyn y  rhwystrau i'r rheini sy'n dioddef allgáu digidol yng Nghymru. Mae Cynllun Cyflawni Cynhwysiant Cymdeithasol wedi'i ddatblygu i osod y targedau i'w cyflawni a'r tasgau i'w gwneud.

Mae Uned Cynhwysiant Digidol Llywodraeth Cymru yn gyfrifol am ddatblygu polisïau strategol, gweithgareddau rhynglywodraethol a goruchwylio'r broses o sicrhau cynhwysiant digidol sydd â'r nod o ddenu pobl at dechnolegau a mynd i'r afael â'r rhwystrau rhag allgáu digidol.

Bydd yr Uned yn gweithio gyda sefydliadau i sicrhau eu bod yn deall ac yn croesawu dulliau cynhwysiant digidol yn y gobaith y bydd y sefydliadau'n newid eu polisïau a'u harferion.