Ffyrdd gwyrdd o deithio o amglych Cymru yr haf hwn

Mae Llywodraeth Cynulliad Cymru yn helpu nifer o gynlluniau trafnidiaeth gynaliadwy yng Nghymru sy'n cynnig dolen hanfodol i ymwelwyr yn ystod misoedd yr haf gan sicrhau bod llai o geir yn rhai o'n cyrchfannau gwyliau mwyaf poblogaidd.

Lonydd Glas Sir Benfro

Lonydd Glas Sir Benfro yw enw'r fenter sydd wedi bod yn gweithio ers dros wyth mlynedd i annog pobl leol ac ymwelwyr, waeth beth fo eu gallu, i deithio mewn modd cynaliadwy fel cerdded, beicio, ar y bws neu'r trên wrth iddynt ymweld ag arfordir â chefn gwlad Sir Benfro.  

Mae gwasanaethau bws yr arfordir yn rhedeg i bob gyfeiriad ar hyd arfordir y Parc Cenedlaethol, gan sicrhau ei bod yn bosibl mynd i bob rhan o 186 milltir (299cm ) y Llwybr Arfordir Cenedlaethol, o Landudoch i Amroth, ar drafnidiaeth gyhoeddus. Mae'r bysys, sy'n rhedeg 7 diwrnod yr wythnos o fis Mai i fis Medi yn gyfleus iawn gan fod pobl ar droed yn cael stopio'r bws unrhywle ar y ffordd a mynd â'u cŵn, byrddau syrffio a'u bygis arno. Mae'r bysys hyn hefyd yn gyfleus i ymwelwyr sydd am gerdded llwybr yr arfordir i un cyfeiriad heb orfod mynd yn eu hôl, ac felly'n fantais dros y car.

Er mwyn gwella'r gwasanaeth ymhellach ar gyfer 2009, mae pedwar o fysys newydd sy'n hawdd i bawb fynd arnynt wedi'u prynu yn lle pedwar o hen fysys arfordir Sir Benfro. Bydd y rhain i gyd yn rhedeg ar olew llysiau sy'n dod o Sir Benfro ac yn cael ei ailgylchu yno. Menter arall yw bws dŵr Havenlink. Cafodd hwn ei dreialu yn 2008 a'i ymestyn i 2009. Mae'r cwch yn croesi hafan Aberdaugleddau gan gysylltu â rhwydwaith bysys yr arfordir. Mae'r bysys dŵr hyn hefyd yn rhedeg ar olew llysiau wedi'i ailgylchu.

I gael rhagor o wybodaeth, ewch i gwefan Lonydd Glas Sir Benfro 

Bysiau Sherpa'r Wyddfa

Hefyd cewch anghofio am yrru a chanolbwyntio ar yr olygfa wrth deithio trwy Eryri ar fysys Sherpa'r Wyddfa. Ar fysys y Sherpa, cewch ymlacio a mwynhau edrych ar y golygfeydd, y trefi a'r pentrefi. O brynu tocyn dydd y Sherpa, cewch ddefnyddio'r rhwydwaith drwy'r dydd i deithio fan hyn a fan draw a disgyn o'r bws bob hyn a hyn yn ôl eich dymuniad. Mae'r tocynnau hyn yn ddilys rhwng Bethesda / Llanberis / Llanrwst / Porthmadog a Chaernarfon. Cewch brynu'ch tocyn £4.00 (£2.00 i blant) ar y bws ei hun. Mae'r Sherpa yn fenter sy'n cael ei darparu gan Agoriad Gwyrdd Eryri, sef partneriaeth sy'n canolbwyntio ar gynnal rhwydweithiau trafnidiaeth gynaliadwy ym Mharc Cenedlaethol Eryri.  I gael rhagor o wybodaeth ewch i gwefan Goriad Gwyrdd Eryri 

Gower Explorer

Mae'r Gower Explorer yn wasanaeth bysys i bobl leol a hefyd yn wasanaeth poblogaidd i ymwelwyr. Mae'r un bysys sy'n mynd â phobl leol ar daith siopa neu fusnes i Abertawe hefyd yn cludo ymwelwyr o ganol dinas Abertawe a'i maestrefi i'r traethau, i'r llwybrau cerdded, i'r atyniadau treftadaeth neu i'r tafarndai neu fwytai lleol i gael pryd da o fwyd. I eraill y daith ei hun trwy brydferthwch Penrhyn Gŵyr yw uchafbwynt y dydd. Cewch brynu tocyn dydd yn rhad gan yrrwr y bws am gyn lleied â £3.70 am Day Explorer sy'n cwmpasu bron y cyfan o rwydwaith Gower AONB Explorer yn ogystal â theithiau lleol i ganol Abertawe a'i maestrefi ac yn ôl.  I gael rhagor o wybodaeth, ewch i gwefan Countrygoer 

Bws y Bannau

Mae Bws y Bannau yn rhwydwaith o fysys sydd wedi'u comisiynu'n arbennig i redeg o'r trefi a dinasoedd mawr i Aberhonddu yn y bore. Mae'r bysys yn dilyn sawl trywydd gwahanol o gwmpas y Parc Cenedlaethol cyn mynd adref trwy Aberhonddu ar ddiwedd y dydd. Os ydych am fynd ar daith i Fannau Brycheiniog neu eisoes wedi cyrraedd, mae Bws y Bannau'n ddelfrydol ar gyfer diwrnod allan heb na char na ffwdan. Mae'r gwasanaeth yn rhedeg bob dydd Sul a Gŵyl y Banc rhwng 24 Mai a 27 Medi 2009. Mae Bws y Bannau'n dathlu'i benblwydd yn 10 oed eleni! Croeso i chi ymuno â'r parti! Mae caffis, tai te, tafarndai ac atyniadau ar hyd y daith yn cynnig gostyngiadau arbennig i deithwyr. Gofynnwch am daflen ar y bws. I gael rhagor o wybodaeth, ewch i gwefan Parc Cenedlaethol Bannau Brycheiniog

26 Awst 2009

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan