Llywodraeth Cymru | Cyhoeddi Adolygiad o Drefniadau Cyflenwi Gwasanaethau Awdurdodau Lleol

Hafan > Newyddion > Llywodraeth leol > 2011 > Cyhoeddi Adolygiad o Drefniadau Cyflenwi Gwasanaethau Awdurdodau Lleol

Cofrestrwch ar gyfer y canlynol: Cylchlythyr | Newyddion

Cyhoeddi Adolygiad o Drefniadau Cyflenwi Gwasanaethau Awdurdodau Lleol

Mae’r adolygiad y comisiynodd y Gweinidog Llywodraeth Leol, Carl Sargeant fis Medi diwethaf o’r ffordd y mae awdurdodau lleol yn darparu gwasanaethau yn cael ei gyhoeddi heddiw.

Dydd Iau 31 Mawrth 2011

Comisiynodd y Gweinidog Joe Simpson o Ganolfan Arweinyddiaeth Llywodraeth Leol i gynnal yr adolygid ar ôl astudiaeth gan Gymdeithas Prif Weithredwyr Awdurdodau Lleol a’i drafodaethau ef ei hun gyda gweithwyr rheng flaen a darparwyr gwasanaethau.

Neges glir y staff a darparwyr y gwasanaethau yw bod y trefniadau ar gyfer cyflenwi gwasanaethau awdurdodau lleol yn aml yn rhy gymhleth. Dywedon nhw hefyd bod ailadrodd yr un swyddogaethau a gwasanaethau 22 o weithiau yn golygu dyblygu diangen, a hynny heb fawr o ddiben.

Meddai’r Gweinidog,

“Mae’n amlwg nad yw dinasyddion yn cael y gwasanaeth gorau y gallwn ei gynnig am y gost isaf. Yng nghyd-destun ein hymdrechion i wella gwasanaethau cyhoeddus ledled Cymru, rhaid inni edrych ar ffyrdd newydd o drefnu gwasanaethau awdurdodau lleol a gweithio gyda’n gilydd.”

Yn ogystal â’r adolygiad o drefniadau cyflenwi gwasanaethau awdurdodau lleol, mae Llywodraeth y Cynulliad yn paratoi adroddiadau ar ddwy swyddogaethau fwyaf awdurdodau lleol Cymru – addysg a’r gwasanaethau cymdeithasol. Mae Comisiwn Annibynnol wedi ystyried dyfodol gwasanaethau cymdeithasol ac mae tasglu annibynnol a sefydlwyd i edrych ar y strwythurau addysg yn cyhoeddi ei adroddiad heddiw.

Ychwanegodd Carl Sargeant,

“Rhaid imi ddweud eto nad testun Adolygiad Simpson yw ad-drefnu llywodraeth leol nac uno awdurdodau lleol. Ei fwriad yw gwella patrymau darparu gwasanaethau er mwyn inni allu targedu’r gwasanaethau sy’n cael eu darparu at y dinesydd a gwneud hynny ar y lefel briodol – boed hynny ar y lefel leol, rhanbarthol neu genedlaethol.

“Mae’r adroddiad hwn yn ddiddorol iawn a bydd yn gyfraniad gwerthfawr at y drafodaeth ar gydweithio ac ailffurfio gwasanaethau ar gyfer y dyfodol. Er y bydd y llywodraeth yn ystyried goblygiadau’r 21 argymhelliad yn yr adroddiad maes o law, dw i’n siwr y gwnaiff lywio’r camau nesaf i gryfhau’r trefniadau ar gyfer darparu gwasanaethau cyhoeddus.

“Trwy weithio gyda’n gilydd, gallwn gyflenwi gwasanaethau sy’n addas i’r oes rydyn ni’n byw ynddi.”