Llywodraeth Cymru | Y Gwasanaethau Brys o dan bwysau cynyddol oherwydd galwadau 999 amhriodol

Hafan > Newyddion > Iechyd a gofal cymdeithasol > 2012 > Y Gwasanaethau Brys o dan bwysau cynyddol oherwydd galwadau 999 amhriodol – Dr Chris Jones

Newyddion

Cofrestrwch ar gyfer y canlynol: Cylchlythyr | Newyddion

Y Gwasanaethau Brys o dan bwysau cynyddol oherwydd galwadau 999 amhriodol – Dr Chris Jones

Mae Dr Chris Jones, Cyfarwyddwr Meddygol GIG Cymru a’r Prif Swyddog Meddygol Dros Dro, wedi rhybuddio fod Gwasanaeth Ambiwlans Cymru ac Adrannau Achosion Brys drwy’r wlad o dan bwysau cyson ac anarferol yr haf yma oherwydd galwadau 999 amhriodol.

Dydd Gwener 17 Awst 2012

Mae cyfuniad o fwy o alwadau 999 a mwy o bobl yn mynd i Adrannau Achosion Brys wedi creu pwysau ychwanegol yn ystod yr ychydig wythnosau diwethaf.
Mae GIG Cymru wedi rhyddhau manylion amryw o alwadau 999 amhriodol a wnaed i’r gwasanaeth ambiwlans yn ystod y misoedd diwethaf.

Mae’r rhain yn cynnwys:

Menyw a alwodd 999 ar ôl i fochdew frathu ei bys.
Dwy alwad 999 gan ddynion oedd â phen mawr ar ôl bod allan yn yfed y noson gynt.
Pobl yn galw 999 yn y prynhawn ar ôl anafu eu hunain y noson gynt. Doedden nhw ddim wedi teimlo’r boen ar y pryd am eu bod o dan ddylanwad alcohol, a dim ond wrth i’r alcohol fynd o’u system roedden nhw wedi dechrau dioddef.
Galwodd menyw 999 yn dweud ei bod wedi anafu ei llaw a’i bod yn gwaedu’n ddifrifol. Cyrhaeddodd criw’r ambiwlans a gweld mai’r gath oedd wedi cripio ei llaw yn ysgafn, a’i bod yn poeni y gallai gael ei heintio
Roedd dyn wedi gweld ei feddyg teulu yn y bore ac wedi cael eli i’w rwbio ar ei gefn. Galwodd 999 yn nes ymlaen a dweud bod ganddo broblem gyda’i gefn. Wrth ei weld yn ateb y drws, gofynnodd criw’r ambiwlans, ‘roedden ni’n meddwl fod gennych chi broblem gyda’ch cefn?’ Atebodd y dyn, ‘Oes, mae gen i. Does gen i neb i rwbio’r eli yma ar fy nghefn!’
Galwodd aelod o’r cyhoedd 999 o dafarn yng nghanol Caerdydd gan ddweud fod ganddo boenau difrifol yn ei stumog. Aeth criw’r ambiwlans ag ef i Ysbyty Athrofaol Cymru. Ar ôl cyrraedd yr adran damweiniau ac achosion brys, neidiodd allan a rhedeg ar wib i’r pellter gan ddweud ‘diolch am y lifft mêt’ dros ei ysgwydd!

Eglurodd Dr Chris Jones nad yw pawb sy’n mynd i adrannau achosion brys neu’n galw 999 yn achos brys mewn gwirionedd:

Dywedodd:

“Mae’r Gwasanaeth Ambiwlans yn derbyn mwy a mwy o alwadau brys amhriodol. Dim ond mewn argyfwng meddygol difrifol y dylid galw 999, fel pan fo bywyd yn y fantol. Mae’r holl wasanaethau iechyd brys yn brysur iawn a dim ond os ydyn nhw wedi’u hanafu’n ddrwg neu’n ddifrifol wael y dylai pobl fynd i adrannau achosion brys.

“Gall cleifion helpu i leddfu’r pwysau ar y gwasanaethau brys, drwy wneud Dewis Doeth. Bydd hyn yn sicrhau bod cleifion yn cael y driniaeth orau, ac yn rhyddhau gwasanaethau brys prysur y GIG i helpu’r bobl sydd angen eu cymorth fwyaf.

"Rwy’n annog pobl sydd angen gofal gan y GIG ond sy’n ansicr pa wasanaeth i’w ddefnyddio, i ystyried defnyddio gwasanaethau eraill fel Galw Iechyd Cymru, yr ap Dewis Doeth newydd ar gyfer eu iPhone, gwasanaethau tu allan i oriau eu meddyg teulu neu fynd i’r fferyllfa leol er mwyn gofalu amdanyn nhw eu hunain yn eu cartrefi."