Lansio Strategaeth Genedlaethol ar gyfer Rheoli Perygl Llifogydd ac Erydu Arfordirol

Mae un o bob chwe eiddo yng Nghymru yn agored i lifogydd afonydd, y môr a dŵr arwyneb. Bydd pob awdurdod lleol yng Nghymru nawr yn llunio ei strategaeth ei hun, ar sail y strategaeth genedlaethol.

Mae’r Strategaeth Genedlaethol yn pennu pedwar amcan ar gyfer rheoli perygl llifogydd ac erydu arfordirol yng Nghymru:

• Lliniaru ar ganlyniadau llifogydd ac erydu arfordirol i unigolion, cymunedau, busnesau a’r amgylchedd
• Codi ymwybyddiaeth o berygl llifogydd ac erydu arfordirol ac annog pobl i ymateb i’r broblem
• Cynnig ymateb effeithiol a chyson i lifogydd ac achosion o erydu arfordirol
• Rhoi blaenoriaeth i fuddsoddi yn y cymunedau sydd fwyaf agored i niwed.

Er mwyn lansio’r Strategaeth Genedlaethol, ymwelodd y Gweinidog â Borth, Ceredigion, lle mae amddiffynfa arfordirol rhag llifogydd yn cael ei chodi i warchod 422 o gartrefi a busnesau. Disgwylir i’r prosiect £12m gael ei gwblhau yn y flwyddyn newydd.

Dywedodd y Gweinidog:

“Mae Llywodraeth Cymru yn ymroddedig i gyflawni’r amcanion hyn fel rhan o’i Rhaglen Lywodraethu, gan addo creu llefydd cynaliadwy i bobl fyw a gweithio ynddyn nhw.

“Mae eu gweithredu nhw yn gyfrifoldeb ar bawb sy’n gysylltiedig â’r gwaith o reoli perygl llifogydd ac erydu arfordirol neu y mae’r mater yn effeithio arnyn nhw, o Lywodraeth Cymru i Awdurdodau Rheoli Risg Cymru a phobl Cymru eu hunain. I ategu’r peth, fe fyddaf i’n newid y ffordd rydyn ni’n cyllido gwaith rheoli perygl llifogydd ac erydu arfordirol yng Nghymru, ac fe awn ni ati yn 2012 i ymgynghori ar y newidiadau hyn.

“Er bod lansio’r Strategaeth Genedlaethol yma yn garreg filltir bwysig wrth reoli perygl llifogydd ac erydu arfordirol yng Nghymru, nid dyma ddiwedd y daith.

“Yn ôl y rhagolygon, wrth i’n hinsawdd newid, fe fydd lefel y môr yn codi, bydd mwy o law yn disgyn ac mae llifogydd amlach yn anochel. Yn sgil y llifogydd, bydd mwy o beryl i fywyd, yr economi a’r amgylchedd. Yn ogystal â hyn, bydd mwy o erydu arfordirol, a bydd mwy o gymunedau arfordirol yn wynebu colli tir, eiddo ac adnoddau.

“Er na allwn ni atal llifogydd nac erydu arfordirol ym mhob man, mae yna gamau y gallwn ni eu cymryd i reoli’r peryglon a lleihau’r canlyniadau. Wrth ystyried rheoli perygl, mae angen inni feddwl am bob agwedd. Mae angen ystyried amddiffyn yn ogystal â mesurau eraill i helpu cymunedau a’r amgylchedd ehangach.

“Bwriad yr amcanion yn y Strategaeth Genedlaethol yw sicrhau ein bod ni’n datblygu system rheoli perygl llifogydd ac erydu arfordirol sy’n gweddu i Gymru ac sy’n ddigon hyblyg i ymaddasu yn y dyfodol.”

Dywedodd Chris Mills, Cyfarwyddwr Asiantaeth yr Amgylchedd Cymru:

“Rydyn ni’n croesawu’r strategaeth hollbwysig hon a fydd yn rhoi lle canolog i lifogydd ac erydu arfordirol o ran sut mae cymunedau a busnesau yn ymbaratoi ar gyfer y dyfodol.

“O bell ffordd, yr her amgylcheddol fwyaf rydyn ni’n ei hwynebu heddiw yw’r newid yn yr hinsawdd. Mae’n debygol o achosi tywydd mwy eithafol ac i lefel y môr godi, gan gynyddu risg llifogydd i bob un ohonon ni.

“O’r 357,000 o eiddo yng Nghymru sy’n wynebu perygl llifogydd, mae 234,000 o’r rhain yn agored i lifogydd arwyneb dŵr ac mae llawer hefyd yn agored i lifogydd afonydd neu’r môr. Mae dŵr arwyneb yn gorlifo pan na fydd systemau draenio a chwlfertau yn gallu ymdopi â glaw trwm iawn, rhywbeth sy’n digwydd yn amlach ac yn amlach.

“Fe fydd y strategaeth hon yn defnyddio ein harbenigedd o ran llifogydd i wneud mwy i helpu awdurdodau lleol a’r cwmnïau dŵr yn eu gwaith i fynd i’r afael â phroblem llifogydd arwyneb dŵr a lleihau’r perygl i gymunedau yng Nghymru.”

Fe fydd natur perygl llifogydd ac erydu arfordirol yng Nghymru a sut mae’n newid yn cael ei adolygu’n rheolaidd, a’r Strategaeth Genedlaethol ei hun yn cael ei hadolygu yn 2016.  

Rhannu

Delicious

Digg

reddit

Facebook

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan