Llywodraeth Cymru | Angen aelodau ar gyfer grŵp newydd i roi cyngor ar addysg cyfrwng Cymraeg

Hafan > Newyddion > Addysg a sgiliau > 2012 > Angen aelodau ar gyfer grŵp newydd i roi cyngor ar addysg cyfrwng Cymraeg

Cofrestrwch ar gyfer y canlynol: Cylchlythyr | Newyddion

Angen aelodau ar gyfer grŵp newydd i roi cyngor ar addysg cyfrwng Cymraeg

Mae pobl sydd â diddordeb mewn addysg cyfrwng Cymraeg yn cael eu gwahodd i fod yn aelodau o grŵp newydd i roi cyngor ar strategaeth Llywodraeth Cymru.

Dydd Llun 25 Mehefin 2012

Mae hysbyseb wedi’i chyhoeddi ar gyfer hyd at saith swydd yng Ngrŵp Cynghori'r Gweinidog ar Strategaeth Addysg Cyfrwng Cymraeg.

Lansiodd Llywodraeth Cymru ei Strategaeth Addysg Cyfrwng Cymraeg ym mis Ebrill 2010. Bydd y grŵp cynghori yn cyfarfod dair gwaith y flwyddyn, dan gadeiryddiaeth y Gweinidog Addysg a Sgiliau. Ei ddiben fydd rhoi cyngor ar ddatblygiad y Strategaeth, yn arbennig o ran cydlynu’r broses o gynllunio’r ddarpariaeth Cyfrwng Cymraeg.

Gwahoddir ceisiadau gan unigolion sydd ag arbenigedd a phrofiad o faterion sy’n ymwneud ag addysg a hyfforddiant cyfrwng Cymraeg. Y dyddiad cau ar gyfer derbyn ceisiadau fydd 16 Gorffennaf 2012.

Mae Llywodraeth Cymru hefyd wedi cyhoeddi ei hail adroddiad blynyddol ar y Strategaeth Addysg Cyfrwng Cymraeg.

Yn ôl Leighton Andrews, y Gweinidog Addysg a Sgiliau:

“Mae’r ail flwyddyn o weithredu’r Strategaeth Addysg Cyfrwng Cymraeg bellach wedi dod i ben, ac mae’r adroddiad hwn yn dangos cynnydd da o ran nodau ac amcanion y strategaeth. Ond mae angen mynd i’r afael â nifer o heriau o hyd.

Mae’n rhaid gweld codi safonau mewn llythrennedd a rhifedd fel blaenoriaeth i bawb, ac ni ddylai unrhyw un danbrisio’r her o ddatblygu llythrennedd yn y Gymraeg a’r Saesneg. Mae angen i ni hefyd gofio bod llai na 20% o ddisgyblion ein hysgolion uwchradd yn manteisio ar ddarpariaeth cyfrwng Cymraeg, felly, rydym wedi datblygu cynllun gweithredu i wella darpariaeth y Gymraeg fel ail iaith ledled Cymru.

Hoffwn ddiolch i gyn-aelodau’r grŵp cynghori am eu gwaith ac rwy’n edrych ymlaen at y cyfle i weithio gydag aelodau newydd pan gânt eu penodi. Bydd y grŵp newydd yn chwarae rôl bwysig iawn wrth ein helpu i wynebu’r heriau a chyflawni amcanion ein Strategaeth Addysg cyfrwng Cymraeg.”