Arddangos sector gwyddorau bywyd deinamig Cymru

Pwrpas yr ymweliad yw tynnu sylw at amrywiaeth y sector yng Nghymru, meysydd ymchwil a datblygu yn y sectorau preifat a chyhoeddus, cyfleon i gydweithredu a buddsoddi, yn ogystal â meysydd arbenigedd penodol.

Dywedodd Edwina Hart, y Gweinidog Busnes, y byddai’r ymweliad (7 ac 8 Mawrth) yn gyfle gwych i hyrwyddo’r sector Gwyddorau Bywyd llewyrchus sydd gennym yng Nghymru,

"Mae’n gyfle gwych i Gymru arddangos ein cwmnïau gwyddorau bywyd gorau a chyfleusterau ymchwil o safon fyd-eang. Trefnwyd bod yr ymweliad yn digwydd cyn ein cynhadledd BioCymru 2012, a gaiff ei gynnal ar 13 ac 14 Mawrth, achlysur pwysig a fydd yn codi proffil sector Gwyddorau Bywyd Cymru ledled y byd.

"Bydd yn help i swyddogion tramor UKTI gael gwybod mwy am yr hyn sydd gan Gymru i’w gynnig a dod i ddeall y cyfleon sydd yma yng Ngymru."

O holl rannau’r daith, Cymru sydd wedi profi fwyaf poblogaidd. Bydd dau ddeg dau o swyddogion UKTI yn ymweld o wledydd fel China, India, Japan, Denmarc a’r Unol Daleithiau.

Bydd busnesau a phrifysgolion Cymru a thimau sector Llywodraeth Cymru hefyd yn gallu datblygu cysylltiadau agosach â UKTI a’i gynrychiolwyr tramor, er mwyn cynyddu mewnfuddsoddiad a phrosiectau cydweithredol yn y tymor hirach.

Mae Llywodraeth Cymru yn cynnal cinio rhwydweithio fin nos 7 Mawrth ar gyfer dirprwyaeth UKTI a rhanddeiliaid allweddol o sector Gwyddorau Bywyd Cymru.