Ysgrifenedig - Lansio’r ymgynghoriad ar y Strategaeth Genedlaethol ar gyfer Rheoli Perygl Llifogydd ac Erydu Arfordirol yng Nghymru

Heddiw rwy'n lansio'r broses ymgynghori ar gynnwys Strategaeth Genedlaethol ar gyfer Rheoli Perygl Llifogydd ac Erydu Arfordirol yng Nghymru.

Mae un o bob chwe eiddo yng Nghymru eisoes yn wynebu perygl llifogydd ac mae rhagfynegiadau'r Newid yn yr Hinsawdd yn awgrymu y bydd y risgiau hyn yn cynyddu yn y dyfodol wrth i batrymau glawio newid ac wrth i lefel y môr godi.  Wrth i'r perygl o lifogydd o ganlyniad i ddŵr wyneb yn benodol gynyddu, ni fydd codi amddiffynfeydd traddodiadol yn ddigonol bellach i'n diogelu rhag canlyniadau llifogydd, felly mae'n rhaid i ni edrych ar ddulliau eraill o reoli'r peryglon yr ydym yn eu hwynebu.

Bydd y Strategaeth Genedlaethol yn pennu amcanion Llywodraeth Cynulliad Cymru ar gyfer rheoli perygl llifogydd ac erydu arfordirol yng Nghymru dros y blynyddoedd nesaf. 

Dyma un o ofynion canolog y Strategaeth fel y nodwyd yn Adran 8 o Ddeddf Rheoli Llifogydd a Dŵr 2010, ac yn yr ymgynghoriad rydym yn ceisio barn ar bedwar o'r amcanion arfaethedig:

• lleihau effeithiau llifogydd ac erydu arfordirol ar unigolion, cymunedau a busnesau
• codi ymwybyddiaeth o berygl llifogydd ac erydu arfordirol a'u cynnwys yn yr ymateb i'r perygl hwnnw
• darparu ymateb effeithiol a pharhaus i lifogydd a digwyddiadau erydu arfordirol
• blaenoriaethu buddsoddi yn y cymunedau sy'n wynebu'r perygl mwyaf.

O dan bob un o'r amcanion hyn y mae cyfres o gamau gweithredu y mae'n rhaid i Lywodraeth Cynulliad Cymru a'r Awdurdodau Rheoli Risg yng Nghymru, gan gynnwys Asiantaeth yr Amgylchedd, yr awdurdodau lleol, y Byrddau Draenio Mewnol a'r Cwmnïau Dŵr eu cymryd.

Mae'r ymgynghoriad hefyd yn cydnabod yn yr hinsawdd economaidd sydd ohoni y bydd angen i ni ystyried yn ofalus sut a lle y byddwn yn buddsoddi yn y dyfodol.  Gofynnir cwestiynau o ran sut y dylwn ni flaenoriaethu buddsoddiad Llywodraeth Cynulliad Cymru ac a ddylwn ni fod yn ceisio cyfraniadau oddi wrth y rhai fydd yn manteisio o ganlyniad i fesurau rheoli risg. 

Bydd y broses ymgynghori yn dechrau ar 16 Gorffennaf ac yn dod i ben ar 8 Hydref, ac rwy'n annog pob un i ystyried yr amcanion hyn a rhoi sylwadau arnynt.