Ydgrifenedig - Arian Ewropeaidd Newydd ar gyfer Rheoli Risg Llifogydd ac Arfordiroedd yng Nghymru

Ym mis Rhagfyr 2008 fe gofiwch imi gyhoeddi ein bod wedi llwyddo i sicrhau £30m yn ychwanegol o gyllid Cydgyfeirio Ewropeaidd er mwyn buddsoddi mewn mesurau risg llifogydd ac erydu arfordirol o fewn ardaloedd awdurdodau lleol cymwys.  Bydd y cyllid hwnnw'n cefnogi rhaglen waith strategol gwerth £65 miliwn i wneud gwelliannau dros y chwe blynedd nesaf.

Bydd y cyllid ychwanegol hwn hefyd yn cael cyllid cyfatebol a fydd yn dod yn bennaf o'r cyllidebau rheoli llifogydd ac arfordiroedd cenedlaethol, gyda chyfraniadau hefyd oddi wrth awdurdodau lleol ac eraill ynghyd â'r £8 miliwn ychwanegol, a fydd ar gael dros y ddwy flynedd nesaf, wedi'i neilltuo o Gronfa Fuddsoddi Cyfalaf Strategol Llywodraeth y Cynulliad. 

Bydd y cronfeydd ychwanegol hyn yn mynd tuag at gynlluniau sy'n cefnogi dull eang o weithredu rheoli risg llifogydd.  Bydd y rhaglen chwe blynedd yn gweld creu amddiffynfeydd newydd a gwell rhag llifogydd ac amddiffyn yr arfordir. Bydd hefyd yn gweithredu ystod o fesurau eraill ar gyfer rheoli risg llifogydd megis systemau draenio trefol cynaliadwy, codi ymwybyddiaeth o berygl llifogydd a chadernid adeiladau mewn cymunedau sy'n debygol o ddioddef llifogydd.

Yn dilyn gwaith a gynhaliwyd gan y Bwrdd Rhaglen Cyllid Cydgyfeirio i gasglu mwy o wybodaeth fanwl ar y cynlluniau hynny a ystyrir yn gymwys i'w cynnwys o fewn ein rhaglen strategol, rwyf bellach yn falch i gyhoeddi cynlluniau sydd wedi'u cymeradwyo i'w cynnwys yng ngham cyntaf y Rhaglen Strategol Rheoli Risg Llifogydd ac Arfordiroedd.

Bydd fy swyddogion yn cydweithio'n agos â swyddogion o awdurdodau lleol, Asiantaeth yr Amgylchedd a Dŵr Cymru Welsh Water, sy'n arwain trwy ddarparu cynlluniau unigol i ddatblygu cynlluniau prosiect manwl ac i helpu gyda'r broses o sicrhau'r arian cyfatebol sy'n ofynnol. 

Bydd rhan gyntaf y cynlluniau yn tynnu i lawr £20m o'r cyllid Rhaglen Gydgyfeirio gwerth £30m sydd ar gael ar gyfer gweithgareddau rheoli risg llifogydd ac arfordiroedd yng Nghymru. Mae rhestr o'r cynlluniau yn Atodiad 1.

Bydd fy swyddogion yn cydweithio'n agos â'r awdurdodau hyrwyddo i gefnogi'r gwaith o gyflwyno pob un o'r prosiectau sy'n rhan o'r rhaglen uchelgeisiol hon o fuddsoddi mewn risg llifogydd.

Mae Llywodraeth Cynulliad Cymru hefyd yn paratoi cynnig strategol am ragor o gyllid Ewropeaidd gan y Rhaglen Gystadleurwydd a fydd, os yw'n llwyddiannus, yn fanteisiol i gynlluniau rheoli risg llifogydd ac arfordiroedd yn yr ardaloedd awdurdod lleol hynny nad ydynt yn gymwys am gyllid cydgyfeirio.