Busnes arfaethedig Cyfarfodydd Llawn Llywodraeth Cynulliad Cymru hyd at etholiadau'r Cynulliad ym mis Mai 2007

Amlinella'r datganiad hwn fusnes arfaethedig Cyfarfodydd Llawn Llywodraeth Cynulliad Cymru hyd at etholiadau'r Cynulliad ym mis Mai 2007.  Mae'r rhaglen ganlynol yn cynrychioli bwriadau Llywodraeth y Cynulliad o heddiw ymlaen.   Mae newidiadau a wneir o ganlyniad i drafod y datganiad busnes wythnosol, er enghraifft, yn debygol o arwain at ddiwygiadau canlyniadol i'r atodlen a amlinellir yma.  

Er hwylustod, mae'r busnes arfaethedig wedi'i rannu yma yn chwe chategori: dadleuon sefydlog blynyddol pwysig; dadleuon Llywodraeth Cynulliad Cymru; Datganiadau Llywodraeth Cynulliad Cymru; busnes pwyllgor ac amser y gwrthbleidiau/meinciau cefn; cynigion i ddirprwyo rhagor o swyddogaethau i'r Cynulliad a rhaglen ddeddfwriaethol arfaethedig y Llywodraeth sydd ar droed.

Dadleuon ar bynciau sefydlog

Bydd amseru'r cynigion i gymeradwyo cyllideb Gwasanaeth Seneddol y Cynulliad, y gyllideb ddrafft ynghyd â'r cynnig i gymeradwyo'r Setliad Llywodraeth Leol a'r gyllideb derfynol yn unol â'r amserlenni a ragnodwyd yn ein Rheolau Sefydlog. Mae'r ddadl ar Araith y Frenhines yn debygol o gael ei chynnal ar ôl toriad hanner tymor yr hydref a disgwylir i'r ddadl ar y Rheolau Sefydlog newydd arfaethedig gael ei chynnal cyn toriad y Nadolig.

Dadleuon y Llywodraeth

Cynigir cynnal dadl ar Strategaeth Blaenau'r Cymoedd ym mis Medi.  Mae'r dadleuon a drefnwyd ym mis Hydref yn ymwneud â'r canlynol:
Diogelwch ar y Ffyrdd; Diogelu Plant Diamddiffyn; y gwaharddiad ar ysmygu a Chwaraeon.

Bwriedir i'r Cynulliad gynnal dadleuon ar y canlynol yn ystod sesiwn olaf 2006 (h.y. ar ôl hanner tymor yr hydref): y Rhaglen Cymunedau'n Gyntaf; y Gwasanaeth Tân; Cynllun Anabledd a Chydraddoldeb Llywodraeth Cynulliad Cymru; Adroddiadau Blynyddol 2005/06 Arolygiaeth Safonau Gofal Cymru a Chomisiynydd Gwasanaeth Iechyd Cymru; yr adolygiad o Wasanaeth Ambiwlans Cymru a'r adolygiad o Gyngor y Celfyddydau.

Ac yn olaf, mae dadleuon y Llywodraeth a drefnwyd hyd yma ar gyfer sesiwn olaf y Cynulliad hwn yn cynnwys dadleuon ar y canlynol: 5ed Adroddiad Blynyddol Comisiynydd Plant Cymru; Gofal Lliniarol; Gwasanaethau Awtistiaeth a dadleuon ar Adroddiadau blynyddol 2005/06 Arolygiaeth Gwasanaethau Cymdeithasol Cymru a Phrif Arolygydd Ysgolion Ei Mawrhydi; trafod materion yn ymwneud â'r Undeb Ewropeaidd a dadl ar drefniadau'r Cynulliad ar gyfer cydweithredu â busnesau.  

Datganiadau Cabinet Llywodraeth Cynulliad Cymru  

Ym mis Medi, mae'r Gweinidog dros Iechyd yn bwriadu gwneud datganiad am Gyllid y GIG a bydd y Gweinidog dros Addysg yn rhoi ymateb y llywodraeth i adroddiad y Pwyllgor ar Ariannu Ysgolion.

Yn ystod sesiwn olaf 2006, bwriedir i'r Llywodraeth ymateb i adroddiad y Pwyllgor ar Seilwaith Rheilffyrdd, adroddiad y Pwyllgor Diwylliant, y Gymraeg a Chwaraeon ar Bapurau Newydd/Trinity Mirror ac adroddiad y Pwyllgor Menter, Arloesi a Rhwydweithiau ar yr Adolygiad Polisi Gwyddoniaeth.   Disgwylir i'r Gweinidog dros Iechyd wneud datganiad hefyd am ganlyniad yr Ymgynghoriad cyhoeddus: “Cynnal a Gwella Gwasanaethau Niwrolawdriniaeth yn Ne Cymru - Cynigion i ddatblygu Canolfan Niwrowyddorau De Cymru".  

Ac yn olaf, ymhlith y datganiadau Cabinet a drefnwyd hyd yn hyn ar gyfer sesiwn olaf y Cynulliad hwn mae: ymateb y Llywodraeth i Adroddiad y Pwyllgor Diwylliant, y Gymraeg a Chwaraeon ar Bêl-droed; prosiect craffu'r Pwyllgor Llywodraeth Leol a Gwasanaethau Cyhoeddus: “Trefniadau Etholiadol yng Nghymru a 5ed Adroddiad Blynyddol Comisiynydd Plant Cymru.

Busnes pwyllgor ac amser y gwrthbleidiau/meinciau cefn

Mae naw dadl gyda'r gwrthbleidiau wedi'u trefnu i'w cynnal cyn toriad y Nadolig ac wyth yn ystod sesiwn olaf y Cynulliad hwn.  

Ym mis Hydref bydd y Cynulliad yn cynnal dadl ar gynnig Rheol Sefydlog 31 i ddiwygio Gorchymyn Cynllunio Gwlad a Thref 2005 i gynnwys darpariaethau newydd ar gyfer meysydd chwarae.  Neilltuir amser hefyd i gynnal dadl ar y cynigion sy'n deillio o dair pleidlais ddiwethaf y Cynulliad hwn a gaiff eu cynnal ym mis Medi a mis Tachwedd eleni ac ym mis Ionawr 2007.  Bydd 30 munud hefyd yn parhau i gael eu neilltuo bob wythnos ar gyfer y ddadl fer.

Caiff dadleuon y Pwyllgor a drefnwyd ar gyfer saith mis olaf y Cynulliad hwn eu cynnal ym:

Mis Medi:

• Adroddiad Blynyddol y Sector Gwirfoddol ac Adroddiad Blynyddol y Pwyllgor Archwilio.  
• Yr Adolygiad Polisi Gwyddoniaeth a gynhelir gan y Pwyllgor Menter, Arloesi a Rhwydweithia.

Mis Hydref:

• Adroddiad Blynyddol Ombwdsmon Gwasanaethau Cyhoeddus Cymru 2005/06.  
• Adroddiad Pwyllgor yr Amgylchedd, Cynllunio a Chefn Gwlad ar y Mesur Morol.  

Mis Tachwedd:

• Adroddiad Blynyddol Pwyllgor y Tŷ ar gyfer 2005/06.
• 7fed Adroddiad Blynyddol y Cynulliad ar Gydraddoldeb.

Mis Rhagfyr:

• Adolygiad y Pwyllgor Diwylliant, y Gymraeg a Chwaraeon o Bêl-droed.

Mis Ionawr:

• Adroddiad y Pwyllgor Cyfiawnder Cymdeithasol ac Adfywio ar Gamddefnyddio Sylweddau.
• Adolygiad polisi'r Pwyllgor Cyfle Cyfartal o'r Gwasanaethau a ddarperir i bobl ifanc Anabl.  
• Prosiect craffu'r Pwyllgor Llywodraeth Leol a Gwasanaethau Cyhoeddus: “Trefniadau Etholiadol yng Nghymru”.

Mis Chwefror:

• Adolygiad y Pwyllgor Cyfiawnder Cymdeithasol ac Adfywio o Ddigartrefedd ymysg Ieuenctid.

Mis Mawrth:

• Adolygiad y Pwyllgor Iechyd a Gwasanaethau Cymdeithasol o Wasanaethau Canser.
• Adroddiad terfynol y Pwyllgor Addysg, Dysgu Gydol Oes a Sgiliau ar Anghenion Addysgol Arbennig - Trefniadau Trosiannol.  
• Adroddiad Blynyddol y Pwyllgor Safonau Ymddygiad ar gyfer 2006.

Rhagor o swyddogaethau newydd i'w dirprwyo i'r Cynulliad  

Mae Llywodraeth Cynulliad Cymru ar ôl negodi ag Adrannau Whitehall wedi sicrhau bod y swyddogaethau canlynol wedi'u dirprwyo i'r Cynulliad, a fydd yn destun cynigion dirprwyo cyn diwedd y Cynulliad hwn:  

Swyddogaethau o dan Ddeddf Galluedd Meddyliol 2005

Mae Deddf Galluedd Meddyliol 2005 yn cwmpasu statud, arferion gorau presennol ac egwyddorion cyfraith gwlad sy'n ymwneud â phobl â diffyg galluedd meddyliol a'r rhai sy'n gwneud penderfyniadau ar eu rhan.  Mae'n cyflwyno cynlluniau diwygiedig a diweddar yn lle cynlluniau statudol cyfredol ar gyfer atwrneiaeth barhaus a derbynwyr Llys Amddiffyn.  Mae hefyd yn creu dau gorff cyhoeddus newydd i gefnogi’r fframwaith statudol: Llys Amddiffyn newydd a Gwarcheidwad Cyhoeddus newydd. Bydd y Ddeddf hefyd yn cynnwys tair darpariaeth allweddol bellach i ddiogelu pobl ddiamddiffyn: Eiriolwyr Annibynnol o ran Galluedd Meddyliol; penderfyniadau ymlaen llaw i wrthod triniaeth a bydd yn cyflwyno trosedd newydd yn ymwneud â thrin person â diffyg galluedd yn wael neu ei esgeuluso.

Gorchymyn Trosglwyddo Swyddogaethau 2006

Mae'r Gorchymyn Trosglwyddo Swyddogaethau yn darparu ar gyfer trosglwyddo swyddogaethau yn ymwneud â:

Gorchymyn Diwygio Rheoleiddio (Diogelwch rhag Tân) 2005, bydd prif bwyslais y diwygio ar atal tân a chyfundrefn ar gyfer asesu risgiau tân.    

Deddf y Cyfrifiad 1920, a fydd yn cyfarwyddo y dylai Gweinidog y Goron ymgynghori â Chynulliad Cenedlaethol Cymru cyn argymell i'w Mawrhydi yn y Cyngor y dylid gwneud Gorchymyn y Cyfrifiad o dan adran 1 o Ddeddf y Cyfrifiad 1920, lle bo Gorchymyn y Cyfrifiad yn cyfeirio at Gymru ac yn trosglwyddo swyddogaeth gwneud Rheoliadau'r Cyfrifiad o dan adran 3 o Ddeddf y Cyfrifiad 1920 i'r Cynulliad cyhyd ag y bo modd arfer y swyddogaeth honno mewn perthynas â Chymru.  Byddai'r broses arfaethedig o drosglwyddo swyddogaethau yn golygu bod gan y Cynulliad fwy o ddylanwad ar y penderfyniadau a wneir gan y Swyddfa Ystadegau Gwladol a'r gair olaf ar gynnwys y Cyfrifiad yng Nghymru yn ogystal â'r ffordd y caiff ei gynnal.  

Bydd adrannau 47(2)(g), 53(2)(c), 55(4) a 66A(6) o Ddeddf y Diwydiant Dŵr 1991 yn galluogi'r Cynulliad i wneud rheoliadau o dan adrannau 74, 47, 53, 55 a 66A, gan ragnodi gofynion mewn perthynas â ffitiadau dŵr, ac atal y cyflenwad dŵr rhag cael ei halogi neu ei wastraffu gan ymgymerwyr dŵr neu garthffosiaeth y mae eu hardaloedd yn gyfan gwbl yng Nghymru.

Swyddogaethau o dan Ddeddf Cymdogaethau Glân a'r Amgylchedd 2005

Bydd Deddf Cymdogaethau Glân a'r Amgylchedd 1990 yn rhoi pwerau mwy effeithiol i Asiantaeth yr Amgylchedd ac awdurdodau lleol yng Nghymru a Lloegr a chynghorau cymuned er mwyn mynd i'r afael ag ansawdd amgylcheddol gwael ac ymddygiad gwrthgymdeithasol.

Swyddogaethau o dan Ddeddf Rheoli Traffig 2004

Mae Deddf Rheoli Traffig 2004 yn darparu ar gyfer prosesau rheoli traffig i leddfu tagfeydd, gwella llifau traffig a gwella amodau i bob defnyddiwr ffordd ar ffyrdd a chefnffyrdd awdurdodau lleol yng Nghymru a Lloegr drwy reoli'r rhwydweithiau ffyrdd cenedlaethol a lleol. Bydd dirprwyo'r swyddogaethau yn rhoi'r pŵer i'r Cynulliad gyhoeddi canllawiau ac arfer y disgresiwn i wneud rheoliadau sy'n berthnasol i Gymru.


Swyddogaethau o dan Ddeddf Tir Comin 2006

Deddf Tir Comin 2006 yw'r ddeddf arwyddocaol gyntaf ar dir comin ers 40 o flynyddoedd.  Bydd y swyddogaethau a gaiff eu dirprwyo yn niferus, a'r un mwyaf arwyddocaol fydd y ffaith y bydd yn galluogi'r Cynulliad i hwyluso'r broses o greu cynghorau tir comin statudol, lle y bydd cominwyr yn ceisio hynny, er mwyn sicrhau y caiff tir comin unigol yng Nghymru ei reoli'n well ac yn fwy cynaliadwy.

Swyddogaethau o dan Ddeddf yr Amgylchedd Naturiol a Chymunedau Gwledig 2006

Mae Deddf yr Amgylchedd Naturiol a Chymunedau Gwledig 2006 yn darparu cwmpas eang o bwerau, sy'n ymwneud yn bennaf â Lloegr yn unig. Mae'n canolbwyntio'n bennaf ar greu Lloegr Naturiol ac ar y Comisiwn Cymunedau Gwledig yn Lloegr, ond mae hefyd yn creu amrywiaeth o swyddogaethau newydd ar gyfer y Cynulliad, gan gynnwys rhwymedigaethau i gyhoeddi a chynnal rhestr o organebau a chynefinoedd o bwys ar gyfer cadw bioamrywiaeth a phwerau i gyhoeddi codau ymarfer sy'n ymwneud â materion cadwraeth naturiol a phenodi pobl i ymchwilio i amrywiaeth o droseddau cadwraeth naturiol.

Swyddogaethau o dan Ddeddf Credydau Treth 2002

Mae Deddf Credydau Treth 2002 yn darparu ar gyfer cynlluniau wedi'u rheoleiddio i alluogi gofalwyr plant cymeradwy i ofalu am blant yng nghartref eu teulu. Bydd swyddogaethau a gaiff eu dirprwyo i'r Cynulliad yn rhoi pwerau iddo lunio cynllun ar gyfer cymeradwyo'r bobl hynny sy'n darparu gofal plant yng nghartref y teulu (heblaw am berthnasau).  Bydd rhieni sy'n cyflogi gofalwr cymeradwy o'r fath yn gymwys i wneud cais am gredydau treth i deuluoedd sy'n gweithio a/neu fuddiannau treth a Chyfraniadau Yswiriant Gwladol mewn perthynas â thalebau gofal plant sy'n gysylltiedig â chyflogwyr.  


Y rhaglen ddeddfwriaethol arfaethedig sydd ar droed

Mae'r canlynol yn rhoi trosolwg byr o'r mesurau y mae'r Llywodraeth yn bwriadu eu cyflwyno drwy is-ddeddfwriaeth cyn i'r Cynulliad hwn ddod i ben, sy'n cynnwys:    

Ar gyfer Addysg, Dysgu Gydol Oes a Sgiliau

• Y Ddeddfwriaeth gylchol flynyddol i gynyddu Grant Dysgu'r Cynulliad, y Lwfans Cynhaliaeth Addysg a'r Cynlluniau Cymhelliant Hyfforddi Athrawon.  
• Cyflwyno mesurau i atgyfnerthu camau i ddiogelu plant drwy ymestyn y gyfundrefn arolygu rheoleiddio i gynnwys y broses o arolygu gweithwyr ieuenctid a chymunedol a mesurau i sicrhau bod gyrfaoedd a gwasanaethau cysylltiedig eraill yn cael eu harolygu mewn ffordd debyg i wasanaethau addysg a hyfforddi eraill yng Nghymru.  
• Deddfwriaeth a fydd yn atgyfnerthu trefniadau ar gyfer lleoliad, iechyd ac addysg plant sy'n derbyn gofal a'r ddeddfwriaeth, a fydd yn gweithredu argymhellion adroddiad Clywch i blant mewn lleoliad addysgol.  
• Deddfwriaeth i gyflwyno safonau maeth mwy llym ar gyfer y bwyd a'r ddiod a ddarperir mewn ysgolion a gynhelir yng Nghymru.

Ar gyfer yr Amgylchedd, Cynllunio a Chefn Gwlad

• Deddfwriaeth i gyflwyno mapiau sŵn strategol ar gyfer ardaloedd trefol mawr a phrif systemau trafnidiaeth gyda'r bwriad o leihau effeithiau niweidiol o ganlyniad i amlygiad i sŵn amgylcheddol.  
• Deddfwriaeth i sicrhau y daw darpariaethau i rym, a fydd yn atal y gwaith o greu hawliau tramwy newydd i ddefnyddwyr cerbydau modur.
• Deddfwriaeth a fydd yn cyflwyno proses lle y bydd y cyhoedd yn cymryd rhan yn y gwaith o asesu effeithiau amgylcheddol cynlluniau Cefnffyrdd a Thraffyrdd.
• Deddfwriaeth a fydd yn darparu sail statudol i reoli'r broses o echdynnu mwynau gan waith carthu morol yn nyfroedd Cymru a gofyniad i asesu effeithiau prosiectau cyhoeddus a phreifat penodol ar yr amgylchedd a'r gwaith o gadw cynefinoedd naturiol ac anifeiliaid a phlanhigion gwyllt o ran echdynnu mwynau gan waith carthu morol.
• Deddfwriaeth i symleiddio systemau cydymffurfio ar gyfer trwyddedu rheoli gwastraff a Rheolaethau Atal Llygredd.  Lleihau biwrocratiaeth a galluogi diwydiant, rheoleiddwyr a'r cyhoedd i ganolbwyntio mwy ar ganlyniadau amgylcheddol a llai ar sut y cânt eu cyflawni.
• Pecyn o ddeddfwriaeth i atgyfnerthu'r broses o nodi tir halogedig ymbelydrol ac atgyfnerthu dyletswyddau arolygu a gorfodi awdurdodau lleol o dan y gyfundrefn.
• Deddfwriaeth i weithredu lefelau uchaf newydd o weddillion plaladdwyr y gallai cnydau, bwyd a phorthiant eu cynnwys ac atgyfnerthu'r cod ymarfer ar werthuso sylweddau gweithredol a ddefnyddir i ddiogelu cynhyrchion planhigion a rhestru'r rhai yr ystyrir eu bod yn dderbyniol.  
• Deddfwriaeth i ddarparu grantiau cymhelliant i'r diwydiant pysgota i annog y broses o osod dyfeisiau llwybro lloeren ar longau pysgota.
• Pecyn o ddeddfwriaeth i sicrhau newidiadau i wella'r broses o gyflwyno'r system gynllunio.
• Cyflwyno rheolau ac amodau rheoli newydd a neilltuwyd i roi mwy o hyblygrwydd i ffermwyr yng Nghymru reoli eu tir a neilltuwyd.
• Deddfwriaeth i gyflwyno system apeliadau tir comin ar gyfer cynlluniau Talu Datblygu Gwledig.
• Deddfwriaeth a fydd yn diogelu aelodau'r cyhoedd sy'n defnyddio cyflenwadau dŵr preifat neu'n bwyta ac yn yfed nwyddau a diodydd a wnaed o gyflenwadau dŵr preifat.

Ar gyfer Iechyd a Gofal Cymdeithasol

• Y rhan olaf o ddeddfwriaeth i ddiddymu taliadau presgripsiwn yng Nghymru.
• Y ddeddfwriaeth i wahardd ysmygu mewn mannau cyhoeddus.
• Deddfwriaeth i sefydlu Comisiynydd Pobl Hŷn yng Nghymru, y cyntaf ledled y DU.
• Deddfwriaeth i ymestyn y categorïau o bobl sy'n gymwys i gael taliadau uniongyrchol i bobl sy'n cael gwasanaethau gofal cymunedol.  
• Deddfwriaeth i sicrhau bod dyletswyddau cyson ar ddarparwyr gofal gwasanaethau cymdeithasol awdurdodau lleol i weithredu eu dulliau sicrhau ansawdd eu hunain er mwyn i Arolygiaeth Safonau Gofal Cymru eu harolygu a chyflwyno gofyniad i ddiogelu a hyrwyddo lles defnyddwyr gwasanaethau drwy gyflwyno fframwaith newydd ar ymdrin â chwynion ac amserlenni ar gyfer datrys cwynion.
•  Deddfwriaeth i weithredu systemau presgripsiynu annibynnol ar gyfer Presgripsiynwyr cymwys sy'n Nyrsys a Phresgripsiynwyr Fferyllol Annibynnol er mwyn darparu gwasanaethau hygyrch cost-effeithiol effeithlon ar draws GIG Cymru i alluogi cleifion i gael gafael ar feddyginiaethau yn gyflymach ac yn fwy effeithlon sy'n lleihau pwysau ar feddygon teulu.  Bydd yn darparu ar gyfer nyrsys/fferyllwyr arbenigol cymwys i redeg clinigau megis diabetes a chlefyd coronaidd y galon.
• Deddfwriaeth a fydd yn ymestyn y penderfyniadau cymhwyso ar gyfer darpar rieni mabwysiadu ac yn darparu safonau rheoleiddio sefydlog ar gyfer gwasanaethau mabwysiadu Awdurdodau Lleol.
• Deddfwriaeth i ddiogelu pobl ddiamddiffyn analluog ymhellach o dan Ddeddf Galluedd Meddyliol 2005.

Ar gyfer Cyfiawnder Cymdeithasol ac Adfywio

• Deddfwriaeth, a fydd yn galluogi Awdurdodau Lleol i gyflwyno Gorchmynion i helpu i atal trosedd ac ymddygiad gwrthgymdeithasol drwy osod gatiau ar draws lonydd ac aleau.  
• Deddfwriaeth i uwchraddio'r Cynllun Effeithlonrwydd Ynni Cartref i sicrhau bod pob cartref cymwys yn gallu cael cymorth o ran effeithlonrwydd ynni.
• Pecyn o ddeddfwriaeth i atgyfnerthu'r broses o reoleiddio eiddo gwag yn y sector preifat.

Llywodraeth Leol a Gwasanaethau Cyhoeddus

• Deddfwriaeth i wella ansawdd ein priffyrdd drwy gyflwyno mesurau i gyflwyno manylebau ar gyfer y deunyddiau i'w defnyddio, y safonau crefft y dylid eu cyrraedd i sicrhau y caiff gwaith stryd ei gyflawni i safon uchel.

Medi 13, 2006